وکی نامہ

ابو الحسن اشعری عباسی دور کے مشہور مسلمان عالم دین تھے۔ وہ 873ء میں پیدا ہوئے اور 935ء میں انتقال فرمایا۔ آپ اس زمانے میں پیدا ہوئے جب غیر مسلم باشندوں سے میل جول اور ان کی کتابوں کے عربی ترجمے ہونے کے باعث مسلمانوں میں غیر اسلامی خیالات تیزی سے پھیل رہے تھے۔ امام احمد بن حنبل اور امام شافعی وغیرہ نے ان خیالات کی روک تھام کی لیکن ان گمراہ کن خیالات کا عقلی بنیاد پر جس نے کامیاب مقابلہ کیا وہ امام ابو الحسن اشعری کی شخصیت تھی۔ آپ نے پہلی مرتبہ دلائل سے اور عقلی بنیاد پر اسلامی عقائد اور نظریات کی صداقت ثابت کی اور ایک نئے علم کی بنیاد ڈالی جو علم کلام کہلاتا ہے۔ جس کا مقصد عقلی دلائل سے اسلام کی سچائی ثابت کرنا ہے۔ وہ تقریباً ڈھائی سو کتابوں کے مصنف تھے جن میں اَلاِبَانہ اور مقالات الاسلامیین مشہور کتابیں ہیں۔